DIASPORA VENETA
INTERNATIONAL VENETIAN FRONT
DIASPORA VENETA - INTERNATIONAL VENETIAN FRONT (DV-IVF) xe na libera asociassion de emigranti veneti (e de so dissendenti) che i se riconosse nel manifesto de DV-IVF.
DV-IVF no xe ligà, e no riçeve schei, da nissun partito politico né organisassion governativa.
I membri de DV-IVF se conforma ai prinçipi del manifesto de DV-IVF, impegnàndose a rispetarlo e a rispetarse tra de lori.
Manifesto de DV-IVF
Premessa
Co ‘l nome de “Veneti” (o de “Popolo Veneto”), consideremo i abitanti de le tere de la Venetia (Serenissima Republica de Venessia), che par nialtri xe l'acession storicamente più coreta.
La region taliana atualmente denominada "Veneto", infati, altro no xe che n’invension geografico-aministrativa del Stato talian e la rapresenta solo un toco de la Venetia originaria, cioè la patria dei Veneti.
Nialtri, Veneti de DV-IVF riconossemo che:
La nostra Patria xe la Venetia, e la so capital moral e cultural xe e resta sempre Venessia, e che ‘l nostro Patrono xe Missier San Marco Evangelista;
Gavemo in comun la stesa e gloriosa storia, tanto che podemo ciamarse "fradeli";
Semo conossui int'el mondo par qualità nostre proprie, come l'onestà, la laboriosità, l'intraprendensa, el altruismo e el rispeto de le legi. E xe co sti co sti trati che volemo farse onor dapartuto.
El Stato talian, e ancora prima el Regno d’Italia, el se ga imposessà de le tere de la Venetia in maniera ilegal e ricorendo a imbrogi e a la violensa. No ghe xe infati prova che ‘l popolo Veneto gabia mai dà libero consenso par essar anesso; ansi, ghe xe un gran nùmaro de episodi (ignorai o censurai da l'invasor talian) che testimonia la so dedission a le istitussion de la Serenissima e la ribelion contro l'ocupante, anca co sparzimento de sangue.
La gran emigrassion ("Diaspora Veneta"), che ga disastrosamente spopolà le nostre tere, la xe stada causada soratuto da le pesantissime condission de vita imposte da l'invasor talian su la fine del secolo XIX.
El Stato talian, portando vanti quelo che gaveva scominsià el regno d’Italia, e ‘l ga perseguìo - e ancora ancùo el persegue - na politica de sfrutamento economico sora la Venetia. E ancora, el ga perseguìo e ‘l persegue n’opera de anientamento de l'identità veneta (lengua, cultura, tradission, storia).
Tratati internassionali, assunti anca dal Stato talian, i prescrive el dirito de autodeterminassion de i popoli. Dirito che i Veneti no i pol in realtà eserçitar, parchè le istitussion taliane no lo permete. Le istitussion che atualmente governa i Veneti, altro no xe che tentacoli del poder de Roma, sensa de na vera autonomia.
La condission de i Veneti se pol definir de facto de suditansa e de colonisassion da parte de l'invasor talian.
Tuti i popoli italici i xe vitime, in na maniera o in n’altra, de la mai bastansa deprecada "unitá d'Italia"; evento che, fati a la man, altro no ne ga portà che tanta morte, miseria e l’esilio par milioni de famegie; e questo pa ‘l voler de pochi cosideti "patrioti", che, cavà qualche ingenuo in bona fede, in realtà el più de le volte altro no i gera che massoni, aventurieri, teroristi e criminali.
Nialtri, Veneti de DV-IVF se impegnemo a:
Ativarse co ogni meso paçifico e leçito al fin che la Patria Veneta la posa gòder del so dirito inalienabile a l'autodeterminassion, e de conseguensa a l'indipendensa;
Propagandar e far conòsser con qualsiasi meso paçifico e leçito i punti fermi riassunti in sto documento darente a:
- organisassion e istitussion locali e nasionaii de residensa,
- organisassion e istitussion internasionali;
- tuti st’altri fradeli veneti, in qualunque parte del globo che i se trova.
Apogiar qualsiasi partito o organisassion cosideta “venetista” che gabia finalità simili a le nostre, e anca analoghi movimenti de altri popoli italici opressi.
Incoragiar l’union de le forse che gabia finalità compagne a le nostre.
Giutar nel limite de le nostre possibilita, e con ogni meso a nostra disposission, i nostri fradeli Veneti in dificoltà.
Tegnir un contato el più costante possìbile co tuti i fradeli veneti, in qualunque canton del mondo che i se trova.
Rifiutarse de colaborar co qualunque organisassion, anca governativa, co finalità contrarie a quele ilustrae in sto documento.